वाडा | प्रतिनिधी
वाडा तालुक्यातील तिळशे गावाच्या हद्दीतील तिलशे कोदे दळवी पाडा येथे आज (दि. ४) सकाळी महावितरणच्या भोंगळ कारभारामुळे एका ४३ वर्षीय व्यक्तीला आपला जीव गमवावा लागल्याची धक्कादायक घटना घडली आहे. गणपत लक्ष्मण दळवी (वय ४३) असे मृत व्यक्तीचे नाव असून, रस्त्यावर तुटून पडलेल्या जिवंत विद्युत तारेचा धक्का लागल्याने त्यांचा जागीच मृत्यू झाला.
नेमकी घटना काय?
मिळालेल्या माहितीनुसार, आज सकाळी सव्वा सहा (६:१५) वाजेच्या सुमारास गणपत दळवी हे नेहमीप्रमाणे आपल्या कामावर जाण्यासाठी घरातून बाहेर पडले होते. पहाटेची वेळ असल्याने रस्त्यावर प्रकाश कमी होता. याच वेळी महावितरण कंपनीची एक विद्युत तार तुटून रस्त्यावर पडली होती. अंधूक प्रकाश आणि कोणतीही सूचना अथवा सुरक्षा अडथळे नसल्याने, दळवी यांच्या ही तार लक्षात आली नाही. चालत असताना त्यांचा पाय या तुटलेल्या तारेवर पडला आणि त्यांना विजेचा तीव्र धक्का बसला. या धक्क्याने त्यांचा घटनास्थळीच दुर्दैवी अंत झाला.
ग्रामस्थांचा तीव्र संताप
या घटनेनंतर परिसरात मोठी खळबळ उडाली असून, स्थानिक ग्रामस्थांनी महावितरण कंपनीच्या विरोधात तीव्र संताप व्यक्त केला आहे. नागरिकांनी आरोप केला आहे की, या भागात वारंवार अशा धोकादायक तारांबद्दल तक्रारी करूनही महावितरण प्रशासनाने त्याकडे सोयीस्कर दुर्लक्ष केले. हा मृत्यू अपघाताने नसून महावितरणच्या निष्काळजीपणामुळे झाल्याचा आरोप ग्रामस्थ करत आहेत.
पुढील तपास सुरू
घटनेची माहिती मिळताच स्थानिक पोलीस आणि महावितरणाचे कर्मचारी घटनास्थळी दाखल झाले. पोलिसांनी पंचनामा केला असून मृतदेह शवविच्छेदनासाठी पाठवण्यात आला आहे. या दुर्दैवी घटनेमुळे दळवी कुटुंबावर शोककळा पसरली असून संपूर्ण परिसरात हळहळ व्यक्त केली जात आहे.
